Calvin quere beber

Xa temos gañadora do concurso, o último do curso, para os profes. É Ana, de Ximnasia, que segundo ela mesma contou, percorreu todo o mural de punta a punta. Cando xa o daba por imposíbel reparou no cómic de Calvin e Hobbes que está no arranque da escaleira e viu a Calvin saíndo do colexio para beber auga na súa casa, ante a súa nai estupefacta.

Moitas felicidades!

Alicia atopou o chupete

Tódolos días chegan nenos á Biblioteca Máxica na hora do recreo. Cada vez achéganse máis, uns pedindo que lles faga un debuxiño na man, outros para charlar un pouco comigo, outros para mirar, outros non sei para que... O caso é que os nenos deste cole son moi divertidos. Está mal que eu o diga, xa que tamén os meus filliños van a este cole, pero sempre que estou cos nenos "ao mogollón" sinto que son ben educados.

Claro, eles berran, porque son nenos, pero non é algo que me volva tola.

Onte a visita foi como cando abres unha billa e sae auga a esgalla. Ao soar a serea do recreo saíron todos a trote, buscando e preguntando onde estaba o chupete (do concurso). "Onde, onde está!" Ian daquí para alá, así un bo pedazo. De súpeto, mentres eu falaba cun neno, todos dicían: "Aquí! Aquí!" Xa se sabe como son os nenos, un o adiviña e todos os demáis repiten a mesma cantinela. Por fin, entre todos recoñeceron que a que primeiro o vira fora...  Tachán!...

ALICIA, de 5ºB.

Non hai dúbida de que Alicia é unha grande observadora. Moitas Felicidades!

Agora só resta que os mestres atopen quen quere beber auga! (Os nenos tamén mo dixeron onte).

Concurso para profes e... propina!

Rematando o curso, case rematada a primeira fase do mural, chegan os últimos concursos da Biblioteca Máxica. Aproveitade a oportunidade de participar!

O primeiro concurso é o que lles tocaba aos/ás profes. Esta é a pregunta:

Quen quere beber auga?

E como propina, facemos outro concurso para os nenos, que foron os máis participativos. E a pregunta para eles é esta outra:

Onde hai un chupete?

Sorte!

Xa hai (nai)... gañadora

Hoxe chegoume por correo electrónico unha mensaxe da mai de Sabela, de 1ºB:

Son a nai de Sabela de 1ºB e penso que a cita e:

"Podrían engendrarse hijos educados si lo fuesen sus padres".

A frase é de Goethe e está xusto no estremo da Biblioteca Máxica que ten fondo azul e tema espacial.

¡Moitas felicidades!

Concurso para os pais

Este venres chegou Candela, de 5ºA, case sen aire. Preguntoume: é un avión? a resposta, é un avión?

Pois si. E foise toda contenta, porque esa era a solución ao xogo desta vez, o dos nenos.

O premio foille entregado hoxe.

Candela tivo moito mérito xa que desta vez non enviamos unha circular para avisar do concurso. É dicir, que Candela visitou o blogue e a Biblioteca Máxica, e isto ponme moi contenta.

Eu aínda non sei se a escasez de comentarios é debida a que o blogue non funciona ben ou temos no noso cole moita vergoña ou preguiza para participar. De todos os xeitos eu non penso cambiar e propoño agora o seguinte concurso, este para os pais.

A pregunta é

"En que cita se fala de nós os pais?"

Lémbrovos que podedes entrar no cole, visitar a Biblioteca Máxica sen medo, que para iso se fai. Para ver e participar. Animádevos.

Concurso: gañadora das tres profes

Constanza enviounos esta mensaxe:

SE EU FOSE MOI, MOI DELGADO, PODERÍA ENTRAR NA CASA POLO BURACO DA PECHADURA.


Saúdos

                    Constanza

Así que xa hai desempate. Constanza é a gañadora do xogo das profes na Biblioteca Máxica. O vindeiro concurso será de novo para os nenos. Estade atentos a este blogue, rapaces!

Quen gañou o concurso dos profes?

Xa temos mestra gañadora do concurso. Chámase Sagrario, de 3ºA... díxomo esta mañá, no cole, diante do mural. Pero cando xa estaba pensando na entrega, entereime que Tucha, de Música, e Constanza, de 6ºA, tamén acertaran, e enviaran un correo electrónico ao meu enderezo hai seis días. A mensaxe pasoume desapercibida entre outras.

Agora véxome no trance de que non podo partir o premio en tres partes, así que despois de pensalo moito ocorréuseme unha idea: facer outro xogo para desempatar entre as tres.

Así que aí vai a pregunta para Tucha, Constanza e Sagrario:

Qué poderías facer se foses moi, moi delgado?

A resposta, nun debuxo da Biblioteca Máxica, como sempre.

Novo Xogo da Biblioteca Máxica, dirixido a PROFES!

Despois dos dous primeiros xogos ou concursos da Biblioteca Máxica, que foron dirixidos, primeiro aos nenos e logo aos pais, tócalle o turno agora aos/ás PROFES!

A pregunta é moi sinxela:

Que lle di a cor vermella ás outras cores?

O mellor é que podedes xogar tanto mirando as fotos do mural en Internet como ollando para os debuxos reais da Biblioteca Máxica no cole.

Animádevos, porque como sempre, haberá un libro de regalo para quen gañe.

Por outra parte Zongalo Quirico quere lembrarvos aos/ás profes que aínda segue aberto o xogo "Contos con Arte" que se convocou hai uns meses, cando empezou isto da Biblioteca Máxica. Con este xogo os vosos alumnos e alumnas poden escribir unha historia que:

1. Ficará inmortalizada nos muros do colexio, na escaleira, cando se execute a 2ª etapa da Biblioteca Máxica (no verán).
2. Os seus contos "estarán ilustrados" por algunha das mellores obras de arte de toda a Historia: Bisontes de Altamira, Murais do Exipto antigo, Giotto, Quinten Massys, Caravaggio, Goya, Mary Cassat, Picasso e Lucian Freud! Aí queda iso!

Como participar? Aquí toda a información.

Contos con Arte - 3ºA

Eu pensaba que aquela proposta que fixera hai meses de que cada curso fixera algo, debuxos, contos, poesía, etc, a partir dunha imaxe dun período da historia da arte xa estaba esquecida. Pero, parece que algúns cursos si a tiveron en conta. Esta semana veu Laly, profesora de 3ºA á Biblioteca Máxica e entregoume dúas historias baseadas no gravado de Goya "Brabísimo".

Ela seleccionou dous textos que son preciosos, para que eu escollera o definitivo, pero xa que traballaron tan ben penso que os dous merecen ser inmortalizados no mural.

Os demais grupos e cursos tamén están a tempo de traer historias sobre a imaxe que lles toque, para participar neste xogo. A parte dos "Contos con arte" aínda será engadida no verán, na 2ª fase do mural.

Pode parecer que este xogo é máis traballoso do que en realidade é. Todo depende de como se plantexe. Vai compensar ver os traballos dos nenos postos na parede, animádevos!

A propósito, moitas grazas, Laly.

Nota: por se queredes refrescar a memoria sobre o xogo proposto para todos os cursos do cole, aquí tedes as instruccións sobre como participar.

Xa hai gañadora para o concurso da Biblioteca Máxica

Hoxe, aínda que con moito retraso, comunicámosvos que xa hai gañadora para o concurso da Biblioteca Máxica adicado aos pais. É a nai de Alicia, de 5º B. Como dato curioso, teño que vos explicar que deu coa resposta correcta desde a súa casa, grazas ás fotos presentes neste blogue e nas galerías de Picasa sobre o mural.

Así que xa foi atopada a "Cynara Cardunculus".

Sempre procuramos que as fotos coa resposta das preguntas do mural estean en Internet, precisamente para que sexa posíbel participar por Internet.

Tras unha conversa cunha nai, que entendera mal de que ia todo isto, quixera lembrar que os concursos que facemos na Biblioteca Máxica, dirixidos alternativamente a nenos, pais e profes, están pensados para estimular a ver o contido -sobre todo o máis miúdo- da Biblioteca e de paso xogar e ver libros. Serven para achegarse e talvez animar tanto a nenos como adultos a participar en construír este grande proxecto, tanto véndo o mural como debuxando, escribindo, ou simplemente dando ideas. Quixera tamén lembrar que o mural e o anticipo do que será a nova biblioteca do CEIP Recimil, que vai ser unha referencia central na actividade do centro cando sexa trasladada á súa ubicación definitiva.

Habería que aclarar, quizá, tamén, que os libros aparecen en diversos idiomas. Tal como son os propios libros das bibliotecas reais. Hai libros en galego, castelán, inglés, mesmo porei algún en chino, en árabe, en francés... porque eu vou pintando libros que van traéndome, libros que queremos todos ou que facemos entre todos e por iso hai variedade. Por outra banda, os libros que están en galego normalmente son os que eu decido.

Por outra parte, volvendo ao tema dos concursos, os premios en sí son o de menos. Aínda que se trate de libros ou cousas relacionadas coas bibliotecas. O importante nos concursos non é gañar, é xogar e divertirse. Se iso non se consegue, deixamos de facelos e en paz.

O vindeiro concurso será para os profesores e profesoras do centro. E como sempre, gañará quen atope primeiro o debuxo misterioso.

Máis Concursos da Biblioteca Máxica

O primeiro concurso da Biblioteca Máxica gañouno unha nena. Moi probablemente, se os deixamos, os nenos serán sempre quen gañen os concursos, ninguén coñece mellor as personaxes dos libros infantís e as atopará tan rápido pintadas na parede.

De modo que para facilitar que os tres colectivos da comunidade escolar (nenos, profesores e pais) podan participar realmente imos facer que os concursos sexan cada vez dirixidos a un colectivo distinto.

Por iso, hoxe convócase o

SEGUNDO XOGO/CONCURSO
DA BIBLIOTECA MÁXICA
(só para nais e pais)

E a pregunta é...

Onde aparece a
Cynara Cardunculus?


Gañará quen descubra
antes a imaxe desta pranta.

Xa sabemos quen durmía na Biblioteca Máxica

Xa hai unha gañadora para o primeiro concurso da Biblioteca Máxica. Inés Sixto, de 5º B adiviñou quen durmía na Biblioteca. Mañá, ás 11,30 da mañá, no recreo, recibirá de mans de Carmen Martín o premio do concurso, que por suposto é de arte, e é un libro.

Tendo en conta que estamos na celebración do día do libro, e o propio tema da Biblioteca Máxica, non cabía outro agasallo mellor.

Non vos desanimedes por non gañar esta vez. Haberá moitas máis ocasións! Estade atentos a este blogue de Zongalo Quirico!

Un grande saúdo a Ánxela Loureiro, que hoxe veu polo cole para falar de que Ota quere voar.

Comezan os CONCURSOS da Biblioteca Máxica!

Aproveito, antes de comezar, para contarvos que está xenial pintar no mural durante as horas do cole porque como previramos, os que me ven pintando sobre a andaimada día tras día implícanse moitísimo máis. E os nenos máis que ninguén. Estimúlame coñecer aos que observan o mural e cambia o modo de traballar. Aínda que quizá é unha manía mía, afeita ao contacto coa xente cando fago o de Pintura en Acción...

En fin, pero vou xa ao asunto. Por favor, redobre de tambores!

Convócase un
CONCURSO
para todo o mundo: nenos, profes, pais...
para toda a xente que pasa por diante do mural.

É moi sinxelo. Se atopas o que che vou dicir no mural,
gañarás un premio, que xa diremos. Aí vai a pregunta:

Quen dorme dentro da biblioteca?

Se pensas que acertaches, ven até a Biblioteca Máxica
 e dime onde o viches.
Ou se prefires, cóntamo por correo electrónico
neste enderezo.